Seranu Puesiole ? La traversée

« Dire et chanter étaient autrefois la même chose » scrivia Jean Jacques Rousseau in u so Essai sur l’origine des langues.

S’omu sà ch’elle anu una storia cumuna puesia è musica, ch’ella hè stata cantata a puesia prima ch’ella sia intrudutta a nuzione di « Generu » da l’istituzione literaria, si parla pocu vulenteri di puesia quand’ella hè messa in musica. Eppuru in Corsica, a leia trà puesia è cantu ùn si hè mai rotta. I nostri impruvisatori di Chjami è rispondi ùn sò sempre chjamati Pueti ? À parte si di l’anni 70, ùn hè statu u cantu à avè cuntribuitu à prumove i nostri più gran pueti ? Si pò dì ch’è no avemu una storia particulare cù u cantu, prova si n’hè u numeru impurtantissimu d’interpreti chì facenu strada da soli o in un gruppu è qualchì volta i dui à tempu. A pruduzzione discografca palesa un investiscimentu creativu forte è u cantu ripresenta una leia essenziale cù a terra è a cumunutà.

Seranu Puesiole ? Presenta cinque dischetti di Patrizia Gattaceca è prupone un mazzulu di testi cù e so traduzzione. Una spassighjata à u core di e parolle è di i so secreti, parolle chì ripiglieranu u so volu subitu ch’elle ritruveranu l’inviluppu sunuru chì l’hà viste nasce.