Scuperta

Stu appuntamentu pari un obligu di a prugramazione musicale avà ! Per quelli ch’ùn la cunnoscenu micca… a serata di Scuperta hè una stonda musicale induve si scoprenu i talenti musicali novi di l’Università ! U scopu hè doppiu : in prima hè di mette in lume ‘ssi giovani chì principianu, ma dinù, di porghje li una scena incù mezi tecnichi ch’elli ùn anu di regula. Durante tutta a serata, a scena s’aprerà dunque à parechji gruppi, canterini, musicanti... Ci truverete ancu a participazione di l’attelli musicali di u Centru Culturale Universitariu, cum’è l’attelli di cantu corsu è l’attellu di cantu varietà internaziunale... Ghjè per voi l’uccasione di scuntrà sti giovani talenti isulani pocu cunnisciuti. Ci ne serà per tutti i gusti è i piacè... A v’assicuremu, cum’è sempre, serà una stonda ricca di surpresa è ch’ùn si pò mancà !