[#JACES2021] Teatru di spressione corsa : Chì parte averà di pettu à l'elaburazione literaria

U Centru Culturale di l’Università di Corsica vi prupone a diffusione d’una stonda in linea, à nantu à e so rete suciale Facebook @CCU Spaziu Natale Luciani è Instagram @ccu_spaziu_natale_luciani in u quadru di a so prugramazione culturale è di e Ghjurnate di l'Arte è di a Cultura.

Anghjulu Pomonti, prufessore di Lingua Corsa è Duttore in Lingua è Cultura Corsa prisenta un stonda in lingua corsa : « Teatru di spressione corsa: chì parte averà di pettu à l’elaburazione literaria ? »

Bench’ella fussi di primura suciale a teatralità tradiziunale, vista per mezu di e pratiche è usi anziani ch’ùn ci hè bisognu à ramintà, pare ch’ellu sia difficiule di chjamà a Corsica terra di teatru. Hè certa chì s’omu pensa infrastrutture, capidopere rimarcati, cumpagnie prufessiunale, istituzione dramatiche (centri di furmazione, critica assestata...), o una definizione socioistituziunale, tandu si dicerà di fatti ch’ellu hè mischinu issu teatru. À livellu propiu testuale hè chjaru chì l’andatura d’elaburazione literaria corsa spessu in a so storia hà sceltu altri puntelli cumu a puesia, a nuvella o di sicuru u rumanzu, da porghje impulsu à l’avanzata di mudernizazione è d’iscrizzione in u mondu. È puru u studiu minutu di i cuntenuti ci porta à esse più prudenti quandu si pensa à dì ch’ellu hè pocu u ribombu di u teatru corsu. Cun stu spostu vulsutu in diacrunia, l’intenzione nostra hè non solu di mette in lume a variatezza è a mudernità di u teatru cuntempuraneu, ma dinù riabilità certi periudi canonici chì saranu stati un pocu in furia cunsiderati arcaichi…