Coru di Perfugas Matteu Peru

Stu cuncertu hè in a cuntinuità di u scontru corsogadduresi di u dopumeziornu da prisintà i travaddi è fà a dimustrazioni di una cumunanza chì si voli è chì si devi assistemà. U Coru di Perfugas Matteu Peru t’hà com’è scopu di ripiddà l’antichi pulifunii sardi, di u rughjonu perfughesi, pà tramandà ci li di a manera a più schietta. Pà sta sirata, a scena sarà sparta incù atteddi di u Centru culturali universitariu pà un scontru è una missa in cunfrontu di i tecnichi vucali è di l’armunii. U cantu in i dui isuli t’hà un postu particulari. Trà i sumiddi è i sfarenzi, i canti sardi è corsi s’ani da intriccià duranti una sirata chì sarà ricca di spartera è di scuparti.