Studià | Le portail étudiant de l'Université de Corse

A parolla di u presidente

Fundata in u 1765 è riaperta in u 1981, l’Università di Corsica Pasquale Paoli hè oghje una struttura di furmazione è di ricerca propiu arradicata à u so territoriu, hà una leia forte cù e prublematiche lucale è internaziunale. Per apre a via di a riescita, di l’inserzione è di l’emancipazione à ogni studiente, l’Università di Corsica s'hè data i mezi à prupiziu, in termini scentifichi, cù una pulitica di ricerca scumpertuta in 8 prugetti strutturanti tutti labellizati da u CNRS, è in termini educativi, cù più di 100 diplomi scumpertuti in 4 duminii maiò fundamentali, chì includenu furmazione prufessiunalizante è insignamenti di prima trinca com’è PACES, o a Scola d’ingegneri cù a scola preparatoria Paoli Tech integrata.

Ste vie strategiche rispondenu à una vulintà di fà fruttificà e cumpetenze acquistate dapoi 30 anni. Hè per ciò chì l’impattu territuriale di l’Università di Corsica ùn si pò spiccà da a so leghjibilità internaziunale, chì ella hè stampata da a nostra participazione attiva à rete di cuuperazione internazionale. A nostra Università hè liata per via di diversi prugramma di scambii à più di 100 istituzione à traversu u mondu ; face parte di l’Associu Ricerca è Cuuparazioni Auro-Meditarranea (cù l’Università di Ghjenuva, Nizza Sophia Antipolis, Parighji VI, Pisa, Tulò è Turinu), chì raggruppa 200 000 studienti è 12 000 insignenti-cercadori ; hà fundatu a Reta d’Eccellenza di i Territorii Isulani (RETI) chì oghje addunisce 26 università isulane in u mondu.

Di modu più largu, per via di i valori ch’ella sumineghja, in particulare a prussimità trà l’attori è l’attaccamentu à un spiritu piunieristicu, l’Università di Corsica articuleghja l’omi è e cumpetenze, e pratiche è l’idee, e risorse è u prugettu. Arrimbata à cunvizzione prufonde, stende a so lascita storica è geugrafica in un pensà di apertura citadina à u serviziu di u sapè, di a ghjuventù è di a Corsica.


Paul-Marie Romani
President of the University of Corsica Pasquale Paoli

Page mise à jour le // par
Prisintazioni