A stampa di a storia in a literatura

À chì feghja a pruduzzione isulana, li spicca subbitu u pesu di a storia in a scrittura, palisendu dinù una primura chì forse ùn li si hè data a so impurtanza: un usu literariu di a storia diversu assai segondu i periudi è i generi. Cun valore educativu è muralizatore in e novelle storiche di u XIXmu seculu, o decoru di rumanzi da mette in scena persunaghji, a luntananza tempurale ghjova da spaisà u lettore. Da un teatru chì eruizava, circava à appacià una identità o dava à fatti storichi un carattere miticu, finu à rumanzi chì ciottanu in a storia da attualizà la, mettendu in risaltu currispundenze o incrinature, da fà capiscitoghju di più u prisente è u raportu ch’è no avemu à u tempu.