Dite la torna a vostra... à l'Università

Sempri cù a radiu RCFM, u Spaziu Natale Luciani accoddi l’emissioni Dite a vostra. Da dui ori à quattru ori di dopu meziornu, ci truvemu incun altri auditori fidi di l’emissioni da raghjunà è barattà in corsu. Temi varii, previsti o à l’allera, mittarani i studianti in situazioni d’immersioni linguistica. Si aprarà torna u Spaziu à l’amichi è circaremu sta volta di cunvià paisani curtinesi chi pudariani arricà stalvatoghji è raconti di u locu. Senza guardà u prupositu o u sprupositu, unugnu sarà cumplici da favurizà u scontru trà generazioni. Semu siguri chì a qualità di a lingua sarà purtata à l’insù da issa cumpagnia trimenda.