E vie folte di u rumanzu

Abbisugneria u spaziu pulifonicu di un rumanzu da pudè fà u racontu di e sperienze rumanzesche in a literatura corsa. Da e prove fiascate à l’esuberanza fundatrice di Dalzetu, da una pruduzzione bramata è attempata finu à a divizia di e scritture è à a diversità di l’accosti di’ssu generu. A manera di percepisce u rumanzu pudia à mumentu datu sprime a ricerca di sicurezza è di ricunniscenza per a literatura, l’esistenza di u generu fà da prova di maturità. Hè oghje di più scumplessata issa visione, l’autori si ne sò impatruniti di u rumanzu, è questu accoglie e vie parechje chì si ponu apre ver’di ogni pussibilità, da u racontu di fattura classica à una scrittura di u dubbitu.