A canzona cum'è ogettu literariu ?

Dimu la subbitu, i raporti trà cantu è puesia sò sempre stati stretti, sarà una particularità di a literatura isulana chì si primureghja pocu di e scumpartere generiche sticchite troppu. Ci hè venuta linda a vuluntà di dà un postu à a canzona in un’antulugia literaria. Generu pupulare di prima trinca, hè venutu u cantu à l’iniziu di u Riacquistu à fà cunnosce u testu pueticu, sò sbucciati testi di creazione chì fermanu frà i più famosi messi in musica, mettendu in rilazione i gruppi di canti di l’epica è l’autori, creendu una dinamica pruduttiva à u livellu di a scrittura è fendu affaccà stili musicali novi, cun parullaghji chì i so testi sò da cunsiderà per certi da pezzi di literatura.