A puesia : u filu è e rumpiture

Ammintà a scrittura puetica da l’anni settanta, e so scelte è e so vie hè una scumessa vera postu ch’ella hè stata diviziosa è multiplice assai a pruduzzione. Una diversità di e spressione chì face ricchezza. Ùn si tratterà di oppone mancu appena un versu liatu di più à forme tradiziunale, ciuttendu sempre inde l’uralità incù cuntenuti è fiure chì rimandanu à issu fondu, è una scrittura chjamata muderna, affrancata si da e custrette di a forma è rinnuvendu l’accostu di certe tematiche. Spampaneghjanu issi dui modi è accade, à le volte, ch’elli s’intreccinu. Oghje, si avvede omu chì sò spuntate voce individuale arrimbate à prugetti estetichi proprii è sugetti novi sò affaccati in puesia.