Dite a vostra... à l'Università

In u quadru di un partenariatu cù a radiu RCFM, l’amicu animatori Ghjuvan Carlu Marsily si movi à u Spaziu Natale Luciani da animà l’emissioni Dite a vostra. Da dui ori à quattru ori di dopu meziornu, unipochi di l’auditori fidi di l’emissioni si truvarani cù studianti di studii corsi da raghjunà è barattà in corsu. Temi varii, previsti o à l’allera, mittarani i studianti in situazioni d’immersioni linguistica.

L’occasioni dinò d’apra u Spaziu à l’amichi curtinesi chi sarani cunviati à una stonda paisana. Senza guardà u prupositu o u sprupositu, unugnu sarà cumplici da favurizà u scontru trà generazioni. Semu siguri chi a qualità di a lingua sarà purtata à l’insù da issa cumpagnia trimenda.